Yang-jen-ga-way-lo-drö’s Grammar Verses
Difficult Points for the Arranging of the Letters: Clear Mirror
Encoded by William Magee
Spoken by Sil-gar Rinpoche
ཡི་གེའི་ཐོབ་ཐང་ཉེར་མཁོ་རབ་གསལ་མེ་ལོང་།
by དབྱང་ཅན་དགའ་བའི་བློ་གྲོ། (1740-1827)
Click at any line of the text to hear it spoken:
།ཡི་གེའི་ཐོབ་ཐང་ཉེར་མཁོ་རབ་གསལ་མེ་ལོང་ཞེས་བྱ་བ་བཞུགས་སོ།
དབྱངས་ཡིག་ཨི་ཨུ་ཨེ་ཨོ་བཞི།
གསལ་བྱེད་ཀ་སོགས་སུམ་ཅུ་ཡིན།
ག་ང་ད་ན་བ་མ་འ།
ར་ལ་ས་རྣམས་རྗེས་འཇུག་བཅུ།
ད་དང་ས་གཉིས་ཡང་འཇུག་གོ
ག་ད་བ་མ་འ་སྔོན་འཇུག
གོ་ངོ་དོ་ནོ་བོ་མོ་འོ།
རོ་ལོ་སོ་རྣམས་རྫོགས་ཚིག་སྟེ།
སླར་སྡུད་ཟླ་སྡུད་ཅེས་ཀྱང་བྱ།
རྗེས་འཇུག་རང་འདྲའི་མཐའ་ལ་སྦྱར།
ན་ར་ལ་གསུམ་རྗེས་སུ་ནི།
ད་དྲག་ཐོབ་ཆེ་ཏོ་ཞེས་སྦྱར།
སུ་རུ་ར་དང་དུ་ཏུ་ན།
ལ་དོན་རྣམ་པ་དྲུག་ཡིན་ཏེ།
རྣམ་དབྱེ་གཉིས་པ་བཞི་པ་དང་།
བདུན་པ་དེ་ཉིད་དུས་ལ་འཇུག།
ས་སུ་ག་བ་ད་དྲག་ཏུ།
ང་ད་ན་མ་ར་ལ་དུ།
འ་དང་མཐའ་རྟེན་མེད་པའི་མཐར།
རུ་དང་ར་གཉིས་ཅི་རིགས་སྦྱར།
གི་ཀྱི་གྱི་འི་ཡི་ལྔ་བོ།
རྣམ་དབྱེ་དྲུག་པ་འབྲེལ་སྒྲ་སྟེ།
ད་བ་ས་ཀྱི་ག་ང་གི
ན་མ་ར་ལའི་རྗེས་སུ་གྱི།
འ་དང་མཐའ་རྟེན་མེད་མཐར་འི།
རྐང་པ་སྐོང་ཚེ་ཡི་འཐོབ་བོ།
གི་གྱི་སོགས་མཐར་ས་སྦྱར་ཚེ།
རྣམ་དབྱེ་གསུམ་པ་བྱེད་པའི་སྒྲའོ།
ཀྱང་ཡང་འང་གསུམ་རྒྱན་སྡུད་དེ།
ག་ད་བ་སའི་རྗེས་སུ་ཀྱང་།
ང་ན་མ་འ་ར་ལ་ཡང་།
མཐའ་རྟེན་མེད་མཐར་འང་དང་ཡང་།
དེ་ཏེ་སྟེ་གསུམ་ལྷག་བཅའ་ཏེ།
ད་དེ་ན་ར་ལ་ས་ཏེ།
ག་ང་བ་མ་འ་རྣམས་དང་།
མཐའ་རྟེན་མེད་མཐར་ས་སྟེ་འཐོབ
གམ་ངམ་དམ་ནམ་བམ་མམ་འམ།
རམ་ལམ་སམ་རྣམས་འབྱེད་སྡུད་སྒྲ།
རྗེས་འཇུག་རང་འདྲའི་མཐའ་ལ་སྦྱར།
ད་དྲག་ཅན་མཐར་ཏམ་སྦྱར་རོ།
ནས་དང་ལས་གཉིས་འབྱུང་ཁུངས་དང་།
དགར་དང་སྡུད་པ་ལ་ཡང་འཇུག
ཀྱེ་དང་ཀྭ་ཡེ་བོད་སྒྲ་སྟེ།
ཕལཆེར་མིང་གི་ཐོག་མར་སྦྱོར།
ནི་སྒྲ་དགར་དང་བརྣན་པའོ།
གང་སུ་ཅི་ཇི་སྤྱི་སྒྲ་སྟེ།
དཔེ་དང་གཞན་ལ་ཅི་སྦྱོར་ཞིང་།
དོན་ལ་ཅི་དང་གང་ཟག་ལ།
སུ་འཐོབ་གང་ནི་ཀུན་ལ་སྦྱར།
པ་དང་ཅན་ལྡན་བདག་པོའི་སྒྲ།
ག་ད་བ་ས་ནམ་པ
ང་འ་ར་ལ་མཐའ་མེད་བ
བདག་པའི་སྒྲ་ལ་པ་ཉིད་དོ།
མ་མི་མིན་མེད་དགག་པའི་སྒྲ།
མ་མི་གཉིས་ནི་ཐོག་མ་དང་།
མིན་མེད་གཉིས་པོ་རྗེས་ལ་སྦྱར།
ཚིག་འཕྲད་ཅིང་ལ་སོགས་པ་ནི།
གད་བ་དང་ད་དྲག་མཐར།
ཅིང་ཅེས་ཅེ་འོ་ཅི་ན་ཅིག
ང་ན་མ་འ་ར་ལ་དང་།
རྗེས་འཇུག་མེད་པའི་མིང་མཐའ་རུ།
ཞིང་ཞེས་ཞེའོ་ཞེ་ན་ཞིག
ས་མཐར་དམིགས་བསལ་ཞེས་མ་གཏོགས།
ཤིང་ཤིག་ཤེའོ་ཤེ་ན་འཐོབ།
ཁ་ཅིག་ལྷན་ཅིག་ཐབས་ཅིག་དང་།
ལན་ཅིག་སོགས་ཀྱི་ཅིག་སྒྲ་དེ།
མིང་གི་ཆ་ཤས་ཡིན་པས་ན།
ཚིག་འཕྲད་གྲངས་སུ་མ་ནོར་གཅེས།
ཆིགས་བཅད་རྐང་པའི་མཐའ་ལ་ནི།
ཉིས་ཤད་ངེས་པར་འཐོབ་པ་ཡིརྣ།
ག་མཐར་ཆིག་ཤད་ང་ཡི་མཐར།
ཤད་ཀྱི་གོང་དུ་ཕྱེ་ཚེག་དགོས།
ཚིགས་ལྷུགས་ལ་ནི་ཛོགས་ཚིག་མཐར།
ཉིས་ཤད་རྣམ་གྲངས་སོ་སོ་དང་།
དོན་ཚན་ཕལ་ཆེར་མཐའ་དང་ནི།
བོད་པའི་སྐབས་ལའང་ཆིག་ཤད་བྱ།
སྡེ་ཚན་ཆེན་མོ་ཛོགས་པ་དང་།
ལེའུའི་མཚམས་སུ་བཞི་ཤད་འཐོབ།
རྐང་པ་སྐོང་དང་མི་སྐོང་ལས།
འོ་འུ་འམ་གྱི་ཚེག་པར་ཡང་།
འཐོབ་ཚུལ་སྐབས་དང་སྦྱར་བར་བྱ།
དེ་ལྟར་རྗེས་འཇུག་དབང་གིས་ནི།
རྣམ་དབྱེ་ཚིག་འཕྲད་མི་འདྲ་བའི།
ཁྱད་པར་ཞིབ་དུ་ཤེས་པར་བྱ།
ཚིག་གི་འདབ་མས་མ་བསྒྲིབས་པའི།
གནད་བསྡུས་འབྲས་བུ་གཡུར་ཟ་བ།
བློ་གསལ་དོན་གཉེར་དགའ་སྟོན་དུ།
དབྱངས་ཅན་དགའ་བའི་བློ་གྲོས་སྤེལ།།